Inuttut inerikkiartorneq peqqinnerlu

Arlaleriarlunga pikkorissaanikuuvunga taasannik ”Inuttut inerikkiartorneq peqqinnerlu.” Pikkorissartut tassaakkajuttarput inuusuttut inuiaqatigiit iluanni artorsaateqarlutillu unittuulaarnikut. Assut iluarineqarsimasumik.

Immineq peroriartornera ajornanngittuaannarsimanngilaq, ilaannilumi sakkortusarsimalluni ilaquttat imigassamik atornerluinerat imminortoqarsimaneralu pillugit. Taamaattumik uku inuusuttut aqqusaartugaat paasisinnaavakka tarrarsoqatigiissinnaallutalu.

Ullut artorsarfiunikut nakkarsaatiginagit nukkassaatitut atortarpakka ajunnginnermut nuannernermullu inuuneqarnissara anguniarlugu! Taannarpiarlu paasitinnissaa anguniakkamma ilagisarpaat pikkorissaaninni, tassami nuanniilliutit nuanniilliutaajuassappata imminullu naakkigerujoortuarluni suunngitsutullu misigaluni, nuannersup tungaanut ingerlariaqqittoqarsinnaanngimmat.

Immineq angajoqqaagut aaliangersinnaanngilagut, kisiannili immineq siunissarput aaliangersinnaallutigu!

Pikkorissaanerup ingerlanerani ikiorsiissutit assigiinngitsut aqqusaartortarpagut, ilinniagarinikuusannit pissarsiarinikuusakka. Taakku saniatigut assigiinngitsunik timersortarpugut ullut tamaasa, pikkorissartunut nuannaarnermik, sinilluarnermik, inuulluarnermillu misigisaqartitsisartumik.

Inuttut inerikkiartorneq sorpassuusinnaapput assigiinngitsutigullu ineriartortoqarsinnaalluni. Uani pikkorissarnermi aallartittarpugut ilummut qiviarluta, qanoq imminnut isiginersut pisimasuunikunullu misigissusaat. Peroriartorneq eqqartorneratigut nalilersortarpaat suut siunissaminnut nassarlugit atorsinnaaneraat iluaqutissatut. Suut inuunermi naleqartinneraat eqqartortarpagut, suut pikkoriffigineraat, suullu pikkoriffiginerulerusunneraat. Pingaaruteqarpoq eqqarsartariaasiat paasissallugu, inissisimaffiat ajunnginnerusumik isigilersinniarlugu, taamaasillugu siunissami periarfissaasunut imminut piukkussinnaanerat annertusisinnaammat.

Taamaaseriarluta siunissaq sammisarparput, sinnattut, ilimagisat, qilanaarisaallu. Amerlasuut aallartinnitsinni nalusarpaat suna kissaatiginerlugu, piffissalli ingerlanerani saqqummeriartulersarput sunngorusussinnaaneq tassungarnissamullu aqqutissaasinnaasut. Eqqarsaatit assitalikkat taakku saqqummilerneratigut inuunermi piumassuseq saqqummeriartulersarpoq! Assilianngortitsineq aamma sammisarparput, taamaasillutik isigisinnaasamik eqqaasitsissutaasinnaasumik sinnattunut sanasarlutigit. Sinnattut anguniarlugit suut aqqusaartoqqaartariaqarnersut erseqqissaqqaartarpagut, allornernit mikinernik angoqqaarneqarsinnaasat, taamaasillutimmi imminut tatiginerullutik anguniagaat ungasippallaarunnaasuusisarpoq.

Pingaarpoq aamma pikkoriffigisaat erseqqissassallugit, imminut upperalutillu tatigisinnaaniassammata pisinnaanerminnut. Ullut ilaat ajornannginnerusarput, ullunilu artorsarfiusinnaasuni suut ikiorsiissutaasinnaaneri aamma ujartortarpagut.

Nerisaqarneq, timersorneq sinillu inuulluarnissamut ineriartorluarnissamullu sunneeqataangaatsiartuupput. Suut nerisarineraat, qanorlu aalatiginersut, sinitsiginersullu aaliangiisuupput qanoq ullup ingerlanerani nukissaqarlutillu eqqarsarsinnaanerinik. Taamaattumik ullormut qanoq innerannut siunissamilu angusaqarsinnaanerannut aaliangiisuullutik. Taakku sammineranni itilisartarpakka suut sunik imaqarnerinik sunniuteqartarnerinillu, qanorlu allannguisinnaanersut.

Attavigisinnaavarma inuusuttunik sullissaqaruit taakkuninnga pikkorissagassaasinnaasunik.

Akia: Apeqqutaavoq ilaasut amerlassusaat sivisussusaalu.