Peqqinnermik ineriartornermillu pikkorissaaneq

Pikkorissaanerit assigiinngitsut neqeroorutigisarpakka.

• "Inuttut ineriartorneq peqqinnerlu" Assigiinngitsutigut pikkorissaaffigisarpakka pikkorissarniat kikkuuneri sunalu anguniagaanersoq tunngavigalugu tulluarsaasarlunga.
• "Nerisaqarneq, timersorneq, eqqarsartariaaserlu peqqinnartoq" Assigiinngitsutigut pikkorissaaffigisarpakka pikkorissarniat kikkuuneri sunalu anguniagaanersoq tunngavigalugu tulluarsaasarlunga.
• "Peqqinneq suliffeqarfimmi" pikkorissaanermi anguniagaavoq sulisut peqqinnerulernissaat, nuannaarnerulernissaallu, taamaasillutillu napparsimasarnerit aamma annikillisarneqassallutik.

Inuttut ineriartorneq

Assigiinngitsutigut ineriartortoqarsinnaavoq, tamattalu assigiinnginnatta pikkorissaanermi aallartissutigisarparput ilummut qiviarluta, qanoq imminnut isiginersut pisimasuunikunullu misigissusaat. Peroriartorneq eqqartorneratigut nalilersortarpaat suut siunissaminnut nassarlugit atorsinnaaneraat iluaqutissatut. Suut inuunermi naleqartinneraat eqqartortarpagut, suut pikkoriffigineraat, suullu pikkoriffiginerulerusunneraat. Pingaaruteqarpoq eqqarsartariaasiat paasissallugu, inissisimaffiat ajunnginnerusumik isigilersinniarlugu, taamaasillugu siunissami periarfissaasunut imminut piukkussinnaanerat annertusisinnaammat.

Taamaaseriarluta siunissaq sammisarparput, sinnattut, ilimagisat, qilanaarisaallu. Amerlasuut aallartinnitsinni nalusarpaat suna kissaatiginerlugu, piffissalli ingerlanerani saqqummeriartulersarput sunngorusussinnaaneq tassungarnissamullu aqqutissaasinnaasut. Eqqarsaatit assitalikkat taakku saqqummilerneratigut inuunermi piumassuseq saqqummeriartulersarpoq! Assilianngortitsineq aamma sammisarparput, taamaasillutik isigisinnaasamik eqqaasitsissutaasinnaasumik sinnattunut sanasarlutigit. Sinnattut anguniarlugit suut aqqusaartoqqaartariaqarnersut erseqqissaqqaartarpagut, allornernit mikinernik angoqqaarneqarsinnaasat, taamaasillutimmi imminut tatiginerullutik anguniagaat ungasippallaarunnaasuusisarpoq.

Pingaarpoq aamma pikkoriffigisaat erseqqissassallugit, imminut upperalutillu tatigisinnaaniassammata pisinnaanerminnut. Ullut ilaat ajornannginnerusarput, ullunilu artorsarfiusinnaasuni suut ikiorsiissutaasinnaaneri aamma ujartortarpagut.

Nerisaqarneq, timersorneq sinillu

Taakku tamatsinnut pingaaruteqartupilussuupput, inuulluarnissamut ineriartorluarnissamullu sunneeqataangaatsiartuullutik. Suut nerisarineraat, qanorlu aalatiginersut, sinitsiginersullu aaliangiisuupput qanoq ullup ingerlanerani nukissaqarlutillu eqqarsarsinnaanerinik. Taamaattumik ullormut qanoq innerannut siunissamilu angusaqarsinnaanerannut aaliangiisuullutik. Taakku sammineranni itilisartarpakka suut sunik imaqarnerinik sunniuteqartarnerinillu, qanorlu allannguisinnaanersut.

Eqqarsartaaseq peqqissoq

Nuannaarusukkuit nuannersunik eqqarsarit. Oqaatigissallugu ajornannginneruvoq piviusunngortinnissaanut, taamaakkaluartorli ulluinnarsiutinngortinnissaa sungiusarneqarsinnaalluni. Inuunermi qujamasuutissat isiginiarnerulerlugit amigaataasut pinnagit. Suut/kikkut nuannaalersittarpaatsit, suullu inuunermi qujamasuutigaagit? Ersarissakkit ulluinnallu taakkuninnga immersorlugu, malugilissavallu ajunnginnermut sunniutai. Kikkulluunniit inuunermi nakkarfeqarsinnaapput, taamaattoqartillugulu pingaarpoq iliuuseqarnissaq qaqeqqinniarluni.

Eqqarsaatit nuannersut niaqqumut ulluinnannullu oqilisaasarput. Arlaannik nuannarinngisaqaruit allannguinissamut iliuuseqarnissat pingaaruteqarpoq. Sunga anguniarpiuk? Qanoq iliorniarpit? Sooq taamaaliussavit? Suna taamaaliornikkut angussaviuk? Sumik ilinnut tunniussaqassava? Taakkua imminut eqqaasitsissutigisassavatit! Eqqarsaatit misigissutsillu immikkoortitserlugit inississorlugillu, suna tamarmi ersarinninngortarpoq oqilisarlunilu.

Akia: Isumaqatigiissutigissavarput. Apeqqutaavoq ullut qassiussanersut.